Reçue à Grenoble, le 30 janvier 1573. Répondue le 31 janvier 1573.

Monseigneur, masseurant que desirés le bien et proffict de monseigneur de

Sainct Sernin come le votre, j’ey prins ceste hardiesse vous faire ce mot

pour vous faire entendre comme par cy devant vous ay escript que mondit

sieur ne se tenant point au lieu et my estre cogneu, il ny est point

come aultresfoys estoit feu monseigneur de Grenoble. Et au

jourd’huy, au temps que nous sommes, nous aurions plus grand

besoingt de support, faveur et ayde que jamais. Car les grandes

charges et succides que nous avons ordinairement tout

le revenu de son abbaye ne y peult souffire. Je croy que monsieur

Mazet vous en escript ung mot affin quil pleut à votre seigneurie

y employé un peu de votre credit. Le principal poinct seroit, come aultres

foys vous ay escript, obtenir lettres du roy de evocation de toutes

les calitées des procès de mondit sieur en aultre parlement qu’en

cestuy cy. Il sentend qu’en première instance, elles sont en la

court du seneschal de ceste ville, mais que dudit seneschal

par appel en dernier ressort vinssent en aultre parlement

quen cestuy de ceste ville, soit au parlement d’Aix, Grenoble

ou aultre, tel que myeulx vous adviserez, car en ce parlement

ont luy faict mille tortz et ny est ouy ny escouté en façon

que ce soit come aussi sont plusieurs aultres. Car ilz font

ce qu’ilz veullent. Ses jours passez ils ont donné ung

arrest pour les paouvres là où ilz ont adjugez la sixiesme

partie du revenu des ecclesiasticques aux paouvres iusques

à la cuillette procheine de traict[er] les decimes sans regarder

les aultres charges quilz ont pour le faict de la guerre.

Ilz sont grand haulmoniers du bien daultruy mais du

leurs, ilz sen scavent bien garder. Oultre cella mondit

sieur, fault qu’il entretiennent vingt paouvres à rayson

de deux soubz pour jour lhomme et deux carolus la

femme, les enfans au dessoubt de douze ans cinq

liardz. Nous luy avons adverty de tout et luy avons

envoyé les arrestz. Il le contraignent aussi à entretenir

et souldoé six souldatz pour la garde et sentinelle

de la ville, à rayson de six francz le moys pour

soldat. Depuys le commencement de ceste guerre

ont a mys quelques garnisons par les villaiges,

gens de piedz que ny servent de rien que de pilher,

[76 v°] manger et ruyner les paouvres villaiges dont ceulx quíl

despendent des terres et seigneuries de mondit seigneur en ont

bien leurs part. Il y a icy ung gentilhomme quont appelle

monseigneur le mareschal Dampville qui donne de commission

à tous propos à de paouvres gentilhommes qu’ilz sont bien

ayses daller vivre sus le bon homme quil bende

tantost d’ung villaige trente escus de laultre

quarante et cinquante et après qu’il[s] ont faict

cella les huguenotz il reviegnent qui emportent

tout le demeurant. Aultre chose il y a que certains

en ce pays mesmes monsieur le presidant du Faur qui

pour donner faulx à entendre à monseigneur dampville

il a obtenu commission de luy pour mettre garnizon en

sa mayson disant que cest pour la seureté et deffence

du pays et nest que pour garder sa mayson et

faict contribuer ung paouvre villaige qui

s’appelle Sainct Saulveur de la terre de mondit

sieur, qu’il contrainct à luy fourny toutes les sepmaines

quatorze livres en façon qu’il en est ruyné. Il

en y a ung aultre qui se nomme monsieur

de Sepet quil n’est que advocat pour le roy

en la court du seneschal de ceste ville qu’a

aussi obtenu une commission pour mettre

garnizon soizante livres pour moys et a contrainct

ung paouvre villaige de la terre de mondit sieur

appellez Castelginetz à luy contribuer pour

garnizon soixante livres pour moys et au

chasteau de tout le temporel de monsieur

de Saint Sernin et par droit ledit Sepet debvroit

plustost contribuer à Castelginest que

Castelginest à Sepet. Car Castelginest est ung

[77] fort et au passaige public et Sepet est une

mayson particullière et ecartée du grand

chemin. Quant nous en avons parlé à monseigneur

le premier president. Il a dict que sus la commision

de mondit sieur Dampville il ne veult entreprendre.

Or monseigneur tout vaut pouvrement et voy bien

quil ny a moyen de y remesdier ; le principal

point, monseigneur, quil vous pleut vous essayer

si on pourroit avoir ladite evocation vous en

pourrés si vous plaict communiquer avec monseur

d’Aiguebelle auquel par cy devant en ay escript aussy.

Si vous sembloit de bon escripre ung mot à monseigneur

Dampville pour avoir lettre de faveur de luy addressant

à messieurs de la court de parlement de ceste ville,

ou a monsieur le premier president et à ses lieutenants

et cappitaines de ce pays d’avoir pour recommandez

les affaires droictz et terres de mondit sieur

de Saint Sernin, cella pourroit valloir de beaucop.

Qui est tout ce que je vous en diray monseigneur,

et faysant fin à ses propos, prieray le

Createur que en bonne santé vous doint

monseigneur, très longue et hereuse vie.

De Thoulouse, le XVI jour de janvier 1573.

Votre très humble et

très obeyssant serviteur

P. Demurs

- TOME : XX

- F : 76::

- F : 77::

- EXPEDITEUR : Demurs, Pierre

- DESTINATAIRE : M. de Gordes

- DATE : 1573-01-31

TYPE : reponse

CAT : reelle

- DATE : 1573-01-16

TYPE : expedition

CAT : reelle

- DATE : 1573-01-16

TYPE : expedition

CAT : affiche

- DATE : 1573-01-30

TYPE : reception

CAT : reelle

- LIEU : Toulouse

TYPE : expedition

GPS : 43° 36′ 16″ N ; 1° 26′ 38″ E

- LIEU : Grenoble

TYPE : reception

GPS : 45° 19' 91'' N ; 5° 73' 62'' E

- HYPERLIEN :

- BIBLIOGRAPHIE :

- NOTE :